不管出了幾張專輯，一去到主持人全都是問這個問題，今天一次在Podcast中解答出來！
各位聽眾朋友大家好，亻厓係客家創作歌手曾仲瑋，係新竹縣个竹東人，亻厓創作海陸腔个客家歌曲。開始客家音樂創作差毋多有12年，目前發行三張客語創作專輯。第一張《掌牛哥》、第二張專輯《仙哥》，舊年底發行咧第三張專輯《O nga O nga》，寫自家這下已經變做爺哀咧，愛㧡起自家个屋下，裡背个心路歷程。這張專輯乜入圍了第三十二屆金曲獎 - 最佳客語歌手獎喔。
一開始會創作客家歌曲，正經愛承蒙亻厓个小學同學 - 張慧君，一直有保持聯絡个亻恩俚，在佢讀中央大學客家文化研究所个時節，拍了一部摘茶阿婆个紀錄片，講一個摘茶阿婆子女當成功了，佢還係逐日恁煞猛做事無休息。
因為慧君知亻厓有在外背唱歌表演，尋亻厓創作一條客家歌曲，分佢个紀錄片做主題曲。該時節亻厓正經當愁慮！因為亻厓毋會講客，仰般做客家歌呢？好在摎亻厓姆討論紀錄片以後，佢試著頭擺个婦人家斯係恁樣形生活啊～細時節斯開始在外背做工換飯吃。嫁人以後為著子女奉獻一生，乜當會理家。子女大了飛出去以後，又係恁樣勞碌做事無停下來，乜係這部紀錄片想愛傳達”認真个阿婆最靚”个想法。
所以阿姆摎亻厓寫當多歌詞下來，斯開始亻厓个第一條客家創作“最靚个阿婆”，收錄在亻厓第一張專輯掌牛哥裡背。當承蒙客家委員會舉辦當多創作比賽，慢慢仔亻厓對寫客家歌乜寫出興趣，開始多了解客家文化、客家詞彙，客語認證。這下乜係新竹市摎新竹縣个國小客語先生喔～開始做還較多个傳承，希望這下个小朋友莫像自家共樣，細時節毋會講客，大了正來學，莫分客家話毋見忒！
今晡日想愛介紹這條歌曲，安著”戀戀路邊花”。毋知路邊花个人可能會試著，路邊个花到底係麽个花呢？其實斯係”魯冰花”。講著”魯冰花”，大家定著會想著台灣文學之母”鍾肇政”先生，當有名个文學作品。有改編過電影，摎電影主題曲：”夜夜想起媽媽的話，閃閃的淚光魯冰花。”，因為鍾先生是龍潭人，龍潭當多茶園，茶園旁脣總會種路邊花來做綠肥，花開做得觀賞，花謝以後做肥草來委肥。所以滿哪係个路邊花這種無私、奉獻个精神，轉化為客家人心肝肚个母親花、阿姆花。
亻厓在一擺有機會參加路邊花節个活動，看著歸山黃淰淰个路邊花，隨風搖擺个樣仔當得人惜。又了解推廣路邊花無私个精神以後，試著當感動。在駛車轉屋當下，一有靈感斯停到路脣，摎副歌寫出來：
”戀戀路邊花，客家阿姆花。佢敢係在路脣，指點亻厓轉屋家。”
”戀戀路邊花，客家阿姆花。用佢个葉摎花，回養滿天下。”
主歌摎副歌中間加入客家山歌”平板”，希望恁樣个結合做得分後生人聽著，客家傳統歌曲乜當好聽！來聽看這條歌曲，戀戀路邊花。
18 Jun 2021
不會唱山歌就不是竹東人？
竹東的山歌比賽已經60年的歷史，所以有句話是這樣說的：不會唱山歌，不要說你來自竹東！
各位聽眾朋友大家好，亻厓係客家創作歌手曾仲瑋，從細在新竹縣个竹東成長，亻厓創作海陸腔个客家歌曲，開始客家音樂創作个時間差毋多有12年，目前發行三張客語創作專輯，第一張專輯《掌牛哥》、第二張專輯《仙哥》，舊年底發行了第三張專輯《O nga O nga》，寫自家這下已經變做爺哀了，愛㧡起這隻屋下，裡背个心路歷程。
今晡日想愛摎大家介紹亻厓寫自家故鄉个歌曲，收錄在第三張專輯《O nga O nga》，歌名安著”天穿日來唱山歌”。好唱客家山歌个人定著會知竹東个山歌比賽，已經舉辦六十年个歷史，當打爽舊年摎今年因為疫情个關係取消，毋過相信最有傳統个竹東客家山歌比賽明年定著會繼續喔～細時節个亻厓，逐擺看著阿婆愛去市場買菜，定著愛跈等去鬥鬧熱。去到竹東市場以後，看著恁多人在脣頭个戲曲公園唱山歌，試著當生趣！聽著佢兜唱只會咿咿喔喔跈嘴尾唱，像”嗨呀囉滴嗨** 嘿呀囉滴嘿嘿呀囉滴嘿唷嗨呀囉滴嗨”**細時節正經印象當深。
因為竹東係山歌城，所以人講毋會唱山歌，莫講你係來自竹東。堵開始創作客家歌曲之後，希望分大家知亻厓係來自竹東，開始在創作裡背加入客家山歌，像平板、山歌子、客家小調全部有。乜承蒙自家个山歌先生謝其國先生摎餔娘曾怡玲，分亻厓有還較多靈感來做流行摎傳統个結合。”天穿日來唱山歌”這首歌曲加入客家傳統小調”撐船歌”，還有講著天穿日係女媧娘補天个由來摎客家莊民情風俗。”有做無做尞到天穿過、有賺無賺總愛尞天穿”，編曲頂背搭配較時行个舞曲風格，當有過年个鬧熱盛況喔！大家共下來聽看啊～天穿日來唱山歌。
各位聽眾朋友大家好，亻厓係客家創作歌手曾仲瑋，來自新竹縣竹東鎮，聽亻厓講話斯知亻厓係創作海陸腔客家音樂个創作人，目前發行三張專輯。第一張係《掌牛哥》，講一個在客家庄摎人扌帣掌牛个細倈仔；第二張係《仙哥》，斯係掌牛哥大咧變成逐日樂線、無愁慮个仙哥；第三張專輯係《O nga O nga》，講自家有倈仔，做毋得樂線咧，肩頭愛㧡起責任咧。這擺第三張專輯入圍咧第32屆金曲獎，正經非常承蒙金曲獎評審先生个肯定，因為舊年有當多當多好聽个專輯，有亻厓欣賞个前輩，還有在餐廳唱歌時節个朋友，有出來比賽母語創作熟識个朋友，還有堵開始創作客家歌曲、大家試著當有發展性个新人。所以這擺做得入圍，一方面感謝專輯製作團隊个幫忙，製作人游鎮宇，姜道、配唱製作人樓羽軒，經紀人李東祐特別感謝。另外一方面乜係肯定咧亻厓自家這幾年个煞猛打拼，認真學習客話。熟識仲瑋个人定著會知，頭兩張專輯大體係亻厓媽媽-劉玉梅女士摎亻厓扌帣手寫歌詞，毋過這張專輯全部係自家作詞作曲，乜總算對得起自家這下國小客語先生个角色，乜係自家創作客家歌曲十年咧，總算有一息息成績出來。
第一條想愛介紹分大家个係主打歌曲O nga O nga，該時節因為亻厓倈仔堵降出來，細細个嬰兒佢逐日onga onga个聲噭分亻厓聽，亻厓雖然試著毋盼得，毋過係希望佢遽遽睡目正會遽遽大，乜毋使緊聽噭聲，聽著發火！所以寫咧一條搖籃曲分佢。第一段爸爸唱，爸爸唱忒換媽媽唱，斯尋亻厓餔娘曾怡玲摎亻厓扌帣手，佢乜係一個當會唱歌个細阿妹仔，從細斯開始唱客家山歌，乜算係亻厓客家个前輩喔！大家共下來聽看這條歌曲～O nga O nga～
Host of 嬰兒嬰兒 O nga O nga?
Claim your podcast to manage its listing and keep your show details accurate.
Pod Engine is an independent podcast discovery and analytics service and is not affiliated with or endorsed by this podcast. Artwork and show content belong to their owners. Full legal notice.
