De Döschkassen

About De Döschkassen

Seit Jahren hat sie einen festen Platz in den Tageszeitungen von Boyens Medien: die Platt-Kolumne „De Döschkassen“. Mit dem etwas anderen Blick auf die Themen, die die Menschen bewegen, aber auch für Abseitiges unterhält „Sabbelbüddel“ Heiko Kroll immer freitags seine stetig wachsende Fangemeinde - auch via „Podkassen“.

Publisher

Heiko Kroll

Category

comedy · news · society & culture

Language

de

Explicit

No

First episode

28 Mar 2019

Latest episode

12 Nov 2026

Latest episodes

372 episodes in the feed.

1. 

   12 Nov 2026

   De ersten 20 Kilometers

   Dat gifft würkli keen annern Minsch op de Welt, mit den ick mi so fein verstoh‘ as mit mien Madam. Wi künnt över allns snacken un wi künnt tosom över den gröttsten Bleudsinn lachen, dat uns de Droon‘ lang de Backen löppt. Jo, wi hebbt echt Glück hatt, dat wi uns funnen hebbt. Natüürli sünd wi ni jümmers över allns een‘ Meenung, un dat kann ook mol ’n dreeviddel Stünn duuern, wenn wi utklabüstert, wat dat to eeten geeven schall. Liekers kriegt wi in de Regel allns torechtklöönt, ohn‘ dat de Huussegen ut‘ Gliekgewicht kümmt. Dat kann een meist langwieli vörkom‘, wenn man dor över nodinkt, wo eenig wi beiden uns sünd. Wenn dor ni de Urlaub weer – beter geseggt de erste Dag vun‘ Urlaub. Dat is würkli jedet Mol datsülbige: Wenn dat in Urlaub gohn schall denn hangt al morns no’t Opstohn so’n unscheuned Knistern in de Luft, un wi kiekt beide ut de Plünn as ’n Koh wenn’t blitzt. Jede Froog vun den een‘ kümmt den annern denn vör as wurr man dör de verdröögte Bloom seggen: „Segg mol, kann dat angohn, dat Du ni ganz schier in Kopp büst?“ Un jede Antwoord heuert sick an, as’n Beleidigung. Is echt wohr. Solang wi noch in’t Huus sünd, hebbt wi uns tomeist noch so jüst un jüst in de Gewalt. Overs wenn wi denn In’t Auto sitten doht… oha. Wenn wi Glück hebbt, schafft wi dat noch bet no de Autobohn-Opfohrt, overs denn geiht de Bomb‘ hoch. Garanteert. Haueha, hebbt wi uns denn in de Flicken. Denn bölkt wi uns an as twee Besopene Priesboxers, un wi sünd an quarken as twee lütte Göörn in Kinnergoorn: „Jo wenn dat so is, denn künnt wi je ook glieks weller no huus fohrn!“ „Jo denn dreih doch üm!“ „Dat geiht fuurts los, de näste Utfohrt is unse!“ „Du wullt doch nu wohl ni echt ümdreihn!“ „Dat warst Du al beleven…“ Wi dreiht denn natüürli ni üm. Overs so 20 Minuten duuert dat Spektokel jedet Mol. Achteran entschülligt wi uns denn beide, un denn hebbt wi uns weller leev un dat ward ’n richti scheun‘ Urlaub. Dösig, ne. Geiht dat annere Poore jüst so? Veellicht schulln wi bi’t näste Mol eenfach de ersten 20 Urlaubs-Kilometers getrennt fohrn… In düssen Sinn

2. 

   5 Nov 2026

   Goodung is nix för mi

   Mien Madam un ick weern in Urlaub. In de Lüneborger Heid‘. Dat weer je an sick würkli scheun. Overs dat weer ’n Wellness-Urlaub. „Wellness“ is je so’n Anglizynismus oder wo dat heet. Also ingelsch. „Well“ dat heet „wohl“ oder „good“. Un „ness“ heet so weel as bi uns de Anhänge „-heit“, „-keit“ oder „-ung“. Man kann Wellness also mit „Wohlkeit“ översetten oder ook mit „Goodung“. Gediegen, ne. Na jo, jedenfalls harr dat Hotel in dat wi weern so’n Wellness-Beriek. Un dor stunn an de Döör „Textilfrie“. Ick heff erstmol an de Rezeptschoon froogt, wat dat heeten schull. Un tatsächli hett dat heeten, wat man dor nokelt wellnessen schull. Hmm. Ick bün je wiss ni prüde oder so. Overs ick mach dat anner Lüüd eenfach ni andohn, dat se mi nokelt bekieken mööt. Ni dat se mi noher noch op Schodenersatz verklogt oder so. Man weet dat je ni, ne. In dat Schwümmbecken hett man overs mit ’n Bod’büx rin dörfst. De Gelegenheit heff ick ook nutzt. Toerst weer ick dor mit mien Seute alleent bin. Overs denn keem‘ dor jümmers mehr Lüüd, all recht wat öller as wi, un all recht wat nokelter as wi. So richti geheuer keem mi dat ni vör, mutt ick seggen. Na jo, denn sünd wi jedenfalls weller rut ut‘ Woter, hebbt uns afduscht, un denn schull dat in de Sauna gohn. Dor weer nokelt ween Plicht. Ick bün dor overs ni ringohn – to hitt för mi. An’t Enn gung dat denn noch in so’n Enspannungskomer. Dor weer so’n Soltkassen bin. Wegen de goode Luft un so. Dat hett dor overs originol rüükt as in’n Liekenhall. Hmm. Liekers hebbt wi uns dor op so’n Liege maneuvert. Un denn schull man lies ween un entspann. Ick kunn dor ni veel mit anfang‘. Un ick heff jümmers no de annern keeken, üm ruttofinnen, woan man markt, dat man ferti is mit dat dorste Entspann‘. Irgendwann is mien Madam denn opstohn un ick gau achteran. Dor weer de Wellness vörbi. Mien Seute hett dat super gefulln. Ick overs weer fix un ferti vun de dorste „Goodung“. Also, ick günn je jedeneen sien Wellness vun Harten, overs mi reckt düsse Erfohrung för den gesamten Rest vun mien Leven… In düssen Sinn

3. 

   29 Oct 2026

   Wat rüükt denn dor?

   Düsse Week heff ick an ’n Kass‘ in Supermart so’n Opsteller mit Duftgenöög för’t Auto sehn. Dor weern ’n poor vun de dorsten „Wunnerbööm“, also Pappbööm, över de man sick eegentli blots wunnern kann, overs ook Duftklemm‘ un denn noch Duft-„Wraps“. Wat genau so’n Wrap ween schall, weet ick ni. Jedenfalls weer dat all so’n Duft-Krom, den man sick in’t Auto hangen oder den man sick klemmen kann. Fröher, as jungen Autofohrer, heff ick ook ’n poor vun düsse Duftdingers utprobeert. To’n Bispeel so’n Pappboom mit den Duft „New Car“. Dat is „Niedet Auto“ op Ingelsch, dormit dat ook ingelsche Lüüd verstohn künnt. De Hoken doran weer, wat dat keen Stück no ’n niedet Auto rüükt hett. Tominst no keen niedet Auto, dat mi betlang ünnerkom‘ is. Veelicht schall de Dunst je doch eher ’n gebruukted niedet Auto immiteern, dat de besten Johrn al achter sick hett. Annerlei, den Duft gifft dat jümmers noch. Jüst so as den Vanilleduft, de mi dormols meist in de Oogen brennt hett. Dat geev dor overs ook den nieden Duft „Black Ice“, also swatted Ies. Hmm. Wat ick weet, rüükt Ies no gor nix. Dat kümmt wohrschienli dorop an, womit man dat Ies düster farvt hett. Veellicht mit Brummelbeern. Veellicht overs ook mit Kattenschiet. Man weet dat ni. Dor geev dat ook den Duft „Supernova“. Oha. Ick weet, dat ’n Supernova, wenn man dor to dicht bi steiht, een geheueri den Dag versaun kann. Overs ick heff ganz un gor keen Idee doröver, wo so’n grooten Rumms rüüken deiht. Wat geev dat Noch? Och jo, „Summer Cotton“. Äh, Boomwull in Sommer? Dat lot ick mol so stohn. Un ook scheun: „Sportfrische“! Also, ick bün mi seeker, dat Lüüd no’n Sport allns annere as frisch rüükt. To den Duft „Midnight Chic“ will mi ook ni recht wat infalln. Overs dat mokt je ook nix. Denn dat gifft je jümmers weller niede junge Autofohrers. Un so lang sick jedeneen vun de blots eenmol so’n Duft-Dings köfft, över dat se sick achteran anstänni wunnert, finnd de Wunnerduft-Produzenten dat ganz seeker richti „dufte“… In düssen Sinn

Reach and audience

Public platform figures. Ratings count people who left a rating, not total listeners.

Spotify

4.8 / 5

20 ratings

Contact De Döschkassen

Guest appearances

Books guests

Based on episode analysis; this does not confirm that the show is currently accepting guests.

Shows with a similar audience

• 

  NDR - Hör mal 'n beten to

• 

  LANZ & PRECHT

• 

  Handelsblatt Morning Briefing - News aus Wirtschaft, Politik und Finanzen

• 

  NDR 2 - Frühstück bei Stefanie