客家國 Hakka Nation

About 客家國 Hakka Nation

在Clubhouse搜尋【客家國 Hakka Nation】社團 週三22:15–【卡拉Hakka】客語歌解釋&教唱 週六22:15–【客語朗讀會】客語文章朗讀 -- Hosting provided by SoundOn

Publisher

鄰長伯& 里長伯

Category

education

Language

zh

Explicit

No

First episode

10 Dec 2021

Latest episode

5 May 2022

Latest episodes

14 episodes in the feed.

1. 

   5 May 2022

   【卡拉Hakka】十七十八田庄女（原曲：滿洲娘）-歌詞解釋&教唱-2022.05.04（附錄：彭月春老師示範教唱）

   十七十八田庄女（改編自日語歌曲 滿州娘） 詞 涂敏恆 改 原曲 鈴木哲夫 涯就係十七十八田庄人家女1 九降風吹來風雪水 媒人並**姐郎2 **入來廳下3 坐 紙炮仔打來乒另乓隆 粢粑仔醃缸4 裝 親家且姆5 正來尞 還記得吾爸吾姆 頭擺識講過 細妹人嫁人愛坐轎 上崎愛凴6 等 下崎愛箭7 等 扛轎8 个師傅一路講笑 你也就毋好笑 嘴燥肚枵莫開口…. 註釋： [1]nginˇgaˊngˋ（四） / ngin gaˋngˊ（海）：在室女 [2] jiaˋlongˇ（四） / ziaˊ long （海）：伴郎 [3] tangˊ haˊ（四）/ tangˋ haˋ（海）：客廳 [4] amˊ gongˊ（四）/ amˋgongˋ（海）：醃菜的陶缸 [5] qiaˊmeˊ（四） / ciaˋmeˋ（海）：親家母 【註】「且」為親家連音 [6] ben（四）/ benˇ（海）：用身體靠著 [7] jien（四）/ zienˇ（海）：腳用力蹬 [8] gongˊkieu（四）/ gongˋ kiau+（海）

2. 

   19 Apr 2022

   【卡拉Hakka】桃花過渡-吳盛智&玉鳳-歌詞解釋&教唱-2022.04.06

   **桃花過渡 **山歌古調 演唱：吳盛智、玉鳳 正月裡來是新年，走路婦人真賺錢；丈夫走無三步腳，風流阿哥帶滿間。 二月裡來人落秧1，孤盲絕代撐2船郎；河邊搭蓋茅草寮，無凳無桌無眠床。 三月裡來三月三，走路婦人路上行；每日食飽無在屋，敗宗敗祖敗名聲。 四月裡來日又長，身無一文撐船郎；日日來往河壩邊，看到婦人像發癲。 五月裡來是端陽，走路婦人無想撞；本莊阿哥賺無食，偷偷摸摸出外庄。 六月裡來人割禾，撐船剋妻死孤盲；撐船可比龜爬沙，頭搖尾搖背駝駝。 七月裡來是立秋，走路婦人毋知羞；日裡擎遮跈人走，老忒無人愛收留。 八月裡來是中秋，撐船老貨面皮皺；有時有日3水浸死，身屍骨頭水上流。 九月裡來是重陽，無妻莫討過路娘；走路婦人毋會降，絕了家中一盆香。 十月裡來小陽春4，無愛撐船做老公；有時有日水浸死，誤了老妹青春時。 十一月裡來又一冬，走路婦人愛威風，捱無想愛汝做餔娘，汝莫想捱做老公。 十二月裡來又一年，撐船老貨捱無緣，老妹連哥千千萬，撐船老貨捱無貪。 註釋： 1.落秧：插秧，然口語上客語慣稱蒔田【sii tienˇ（四）/ shi+ tien（海）】 2.cang （四）/ changˇ（海） 3.iuˊ siiˇ iuˊ ngidˋ（四）/ rhiuˋ shi rhiuˋ ngid（海）：某年某月；總有一天 4.seuˋ iongˇ cunˊ（四）/ siauˊrhong chunˋ（海）：農曆十月別稱小陽春

3. 

   24 Mar 2022

   【卡拉Hakka】做吾餔娘好無-黃鎮炘-歌詞解釋&教唱-2022.03.23

   做吾餔娘好無 黃鎮炘 詞/曲 黃鎮炘 收著紅帖知有朋友愛結婚（偷偷想） 哪時1 正會換涯來做新郎 自家無緊張 世大2 問爺哀3 愁媒人月老 遽遽分涯 好姻緣 若4 無對象若無棄嫌5Line 看看（莫敗勢） 真心邀請你來做做朋友 了解吾個性 有誠意有準備有緣正過來做盡尾 人生重要个決定 靚細妹 啊靚細妹仔 涯有認真做事 乜有惜人个情 毋使分你洗衫 也毋使分你煮飯 毋知你有歡喜 做吾餔娘6 好無 靚細妹 啊靚細妹仔 涯係生來老實 乜有良善个心 陪你曬日頭賞月光 陪你到老 毋知你有合意7 做吾餔娘好無 註釋： [1] 【同義詞】哪久；幾時 [2]世大人 shiˋ(53)taiˋnginˇ(113)（大）/ sii tai nginˇ（四）/ shi+ tai+ ngin（海）：長輩 [3]rhaˇ(113) oi+(33)（大）/ iaˇoiˊ（四）/ rha oiˋ（海）：雙親 [4] na+（大）/ na（四）/ na+（海）：如果 [5] kiˋ(53) hiamˇ(113)（大）/ ki(hi) hiamˇ（四）/ kiˇ(hiˇ) hiam（海）：嫌棄 [6] bu+(33) ngiongˇ(113)（大）/ buˊngiongˇ（四）/ buˋngiong（海）：妻子 【註】六堆四縣妻子不稱餔娘，謂之姐仔jiaˋeˋ；然北部客語姐仔為「偏房、側室」之意 [7] gagˋ(21) rhiˋ(53)（大）/ gagˋ i （四）/ gag rhiˇ（海）：滿意

4. 

   15 Mar 2022

   【卡拉Hakka】客家世界（客家電視台台歌）-歌詞解釋&教唱-2022.03.09

   客家世界（客家電視台台歌） 詞／曲：黃連煜 就像大雨後个天弓1 紅羅花色高掛在空中 希望恩个世界 多姿多彩 多情多義多笑容 紅男綠女歡歡喜喜 牽手鬧洋洋 這係客家世界 餳2 人个地方 等你來尞做英雄 阿公啊 挨弦仔3 阿婆就來唱山歌 句句唱出 客家个智慧 恩係現代个客家人 世界个客家人 恩有豐富又精采个 客家文化呦 恩係快樂个客家人 實在个客家人 恩愛煞猛打拚 共心開創 客家世界 呦呦得呦 鮮鮮个河水 流向該大海 日久他鄉變故鄉 管你哪位來 註釋： [1] tienˊgiungˊ（四）：彩虹 【註】海陸腔不叫天弓，叫虹：kiung+ [2]xiangˇ（四） / sia（海）：吸引 [3] aiˊhienˇ eˋ（四） / aiˋ hien er（海）：拉胡琴 【註】又稱 鋸弦仔 gi hienˇ eˋ（四）/ giˇhien er（海）

5. 

   24 Feb 2022

   【卡拉Hakka】在這恬靜个暗晡頭-劉若英&黃連煜-歌詞解釋&教唱-2022.02.23

   在這恬靜个暗晡頭-劉若英、黃連煜 詞/曲 黃連煜 （男） 哦….結局1 毋使問 做麼个愛想佢 在這恬靜2 个暗晡頭 飯也食毋落 目也睡毋落 想起來實在真冤枉 （女） 喂….麼个就毋使唱 做麼个愛想涯 在這恬靜个暗晡頭 你飯也食毋落 目也睡毋落 想起來實在真堪該3 做你4 去外背5 做大爺 做你去外背做乞食6 涯正毋會愁 涯正毋會愁 （男） 涯也知你毋會愁 涯也知你毋會噭7 遽遽8 開門分涯落 毋好害涯企到天大光 毋好害涯企到天大光 註釋： [1]giedˋkiug（四） / gied kiugˋ（海） [2]diamˊqin （四） / diamˋcin+（海）：安靜 [3] kamˊ goiˊ（四）/ kamˋ goiˋ（海）：活該 [4] zo ngˇ（ngiˇ）（四）/ zoˇngi（海） 【句型】做你+V…：隨便你V [5]ngo boi（四）/ ngo+ boiˇ（海）：外面 [6] kiedˋsiid（四）/ kied shidˋ（海）：乞丐 【註】口語乞食仔（四：eˋ/海：er） [7] gieu（四）/giauˇ（海）：哭 [8] giagˋgiagˋ（四）/ giag giag（海） 教學日期：2022.02.23

6. 

   17 Feb 2022

   【卡拉Hakka】全聯福利中心主題曲客語版-歌詞解釋&教唱-2022.02.16

   全聯福利中心主題曲--客語版 這位个逐儕1 人 全2 有滿足3 个笑容 用盡實在个態度4 愛分你感動 逛街5 購物6 大家東西毋使愁 嗯哩係同你省錢个好朋友 全聯福利中心 社區个便利中心 全聯福利中心 屋下購物个美好天地 嗯哩就在脣項7 恬恬用愛關心你 全聯福利中心 實在當便宜 (口白) Woo〜實實在在共下便宜買好貨 LALA〜簡簡單單分你快樂好時光 全聯福利中心 實在當便宜 [1] dagˋsaˇ（四）/ dag sa（海）：每個人 [2] qionˇ（四） / cion（海）：都 [3] manˊjiugˋ（四） / manˋziug（海） [4] tai tu（四） / taiˇtu+（海） [5] ongˇgieˊ（四）/ong gaiˋ（海） [6] gieu vud（四）/ gieuˇ vudˋ（海） [7] sunˇhong（四）/ shun hong+（海）：旁邊 教學日期：2022.02.16 YouTube動態歌詞cover： https://www.youtube.com/watch?v=VeYJdYrRGPE 原歌曲： https://www.youtube.com/watch?v=IlnusovKZ4M

7. 

   10 Feb 2022

   【卡拉Hakka】髻鬃花-鄭朝方-歌詞解釋&教唱-2022.02.09

   髻鬃花 -- 鄭朝方 詞 葉國居 / 曲 鄭朝方 在家鄉 開等一蕊白白靚靚个花 一蕊花 看起來就像人擎等一支遮1 打早2 在田園山崎3 暗晡頭又轉到吾个屋下 該蕊花 係阿婆頭林（那）頂个髻鬃4 花 髻鬃花 毋驚日頭烈烈天公轉風車 毋管到哪位5 心肝儘採 心頭暖 一支遮 髻鬃花 你看該 迷人花香毋會差 該蕊花 汗水香 囥6 等親情分麼儕 髻鬃花 係恁樣 勞勞碌碌7 朝晨做到日頭斜斜8 髻鬃花 你看該 阿婆越老越開花 該蕊花 白雪雪 青絲變白髮9 為了家 這蕊花 係恁樣形个永永遠遠 日日年年開等啊 註釋： [1]zhaˋ（海）/ zaˊ（四）：雨傘 [2]daˊzoˊ（海）/daˋ zoˋ（四）： 一大早 [3]sanˋgiaˇ（海）/sanˊgia（四）： 山坡 [4] giˇ zungˋ（海）/gi zungˊ（四）： 古代客家婦女的一種髮髻樣式 [5] nai+ vui+（海）/nai vi（四）：哪裡 [6] kongˇ（海）/ kong（四）：藏 [7] lo lug （海）/ loˇlugˋ（四） [8] cia（海）/ qiaˇ（四） [9]【易錯】 fad（海）/ fadˋ（四） 教學日期：2022.02.09

8. 

   27 Jan 2022

   【卡拉Hakka】月光光-邱幸儀-歌詞解釋&教唱-2022.01.26

   **月光光 **邱幸儀 詞/曲：邱幸儀 日頭忒烈1 拿毋定愛行哪一條路 安靜个夜又想起阿公个慈容 添放忒（核）2 麼个時節涯緊行緊遠 尋毋轉自家 在阿婆屋下有千百條故事个牛眼3 樹 下共下吊晃槓（仔）4 田坵裡背鏡鮮5 个圳仔 涯等共下覓蜆仔6 為了麼个愛離開頭擺單純个世界7 想念童年 月光光 秀才郎 這个故事涯已經從8 細聽到大 對頭擺仔流傳下來 月光光 秀才郎 今晡日涯等變na 無一樣 在月光底下講古个老人家哪去咧 想念童年 [1]ladˋ（四） / lad（海）：熱、燙 [2]tiamˊbiong tedˋ（四） / tiamˋbiongˇ ted（海）：忘記，遺忘 【註】六堆四縣「添放忒」亦作 「添放核（hedˋ）」 [3] ngiuˇ ngianˋ（六堆四縣）/ ngiuˇ ngienˋ（北四縣）/ ngiu nganˊ（海）：龍眼 [4] diau gongˇ gong eˋ（四）/ diauˇgong gongˇ er（海）：盪鞦韆 [5] xienˊ（四）/ sienˋ（海）：水質清澈 [6] mi hanˋ eˋ（四）/ miˇhanˊ er（海）：撈河蜆 [7] 【比較】giai（六堆四縣） gie（北四縣） gaiˇ（海陸） [8] 【注意】念qiungˇ（四縣）! ciung（海陸）！

9. 

   21 Jan 2022

   【卡拉Hakka】極樂-解釋&教唱-2022.01.19

   極樂 陳永淘 詞/曲 陳永淘 細人打極樂1 廟坪2捩捩轉3 大人捩捩轉 廟公像極樂 東方有極樂 西方也極樂 四向捩捩轉 地球大極樂 地球捩捩轉 風搓4 打5 極樂 目珠捩捩轉 頭腦打極樂 夜想千條路 醒了磨豆腐6 時來運又轉 兩腳無搭地7 大官食細官 細官食百姓 拚到兩頭烏8 火燒钁頭9 柄 有人閒錢䌈10 狗頸 有人鑊嫲11 吊上棟 看鴨嫲落食12 哪隻知坑13 窮 人生毋多知14 無常沒人知 人心毋知足 像泥蛇 15 吞大象 生時無帶來 死了帶毋去 生時無帶來 死了帶毋去 生時無帶來 死了帶毋去 生時不帶來 死了不帶去 [1] kidˋ logˋ(海)/kid log (四):陀螺 [2] miau+ piang(海)/meu piangˇ(四):廟前空地 [3] lid lid zhonˊ(海)/ lidˋlidˋzonˋ(四):不停轉動 [4] fungˋcaiˋ(海)/ fungˊcaiˊ(四):颱風 [5] 玩陀螺的動詞 [6] rha+siongˊ cienˋ tiau lu+(四)/ siangˊliauˊmo+ teu+fu+(海) 【俗諺】勸人凡事不要流於空想，要付出實際行動腳踏實地做事。 [7] dab ti+(海)/ dabˋti(四):踏到地面 [8] liongˊteu vuˋ(海)/ liongˋteuˇvuˊ(四): 「天未亮」到「天已黑」，喻早出晚歸 [9] giog teu(海)/ giogˋteuˇ(四):鋤頭 [10] tag(海)/ tagˋ(四):綁 [11] vogˋma (海)/vog maˇ(四):大鍋子 [12] logˋshidˋ(海)/log siid (四):覓食;討生活 [13] hangˋ(海)/ hangˊ(四):小溪 [14] m doˋdiˋ(海)/mˇ doˊdiˊ(四):不知不覺 [15] nai sha(海)/ naiˇ saˇ(四): 【註】一種常見於台灣田間的無毒小型 蛇類，華語稱為「鉛色水蛇」。

10. 

    17 Jan 2022

    【客語朗讀會】110 年全國語文競賽客家語朗讀文章高中學生組 編號 2 號 【跌米籮】海陸腔、四縣腔、四縣關西腔-- 2022.01.15

    客語朗讀，彭月春老師指導 110 年全國語文競賽客家語朗讀文章高中學生組 編號 2 號 【跌米籮】李秉璋原作 （海陸腔） 雖然講一分打拚，一分收成，毋過對耕種人來講，較多个係看天食飯！順風順雨大豐收，斯當歡喜，毋過，係堵著落價，該斯無採工咧，價數便宜到像豬屎樣無人愛。若係堵著天旱、禾熱病1、發風搓，做下都無好收成，該斯當慘。天氣當熱，乜係愛在田町放勢做事，做到大汗潑小汗，對少年拚到老，從打早做到暗，做到看人面毋著，全係為著想愛過較好一兜个生活。對海脣到平洋，滿哪位都有廟，分百姓个心靈有一隻寄託个所在。 水汴頭2，一隻樸實个詔安客莊頭。祖先在清朝康熙時代斯過來臺灣，在這生活。為著求平安，望有好收成，這莊頭有一隻流傳百過年、當特別个風俗──跌米籮。講起米籮，係頭過耕種人定著用得著个傢啦伙。無論係㧡穀、㧡菜、㧡番薯、㧡地豆全用得著。水汴頭个崇賢寺逐年正月半暗晡，歸莊頭个人斯會來到這。頭下碼，大家來跌爐主3摎四個頭家，負責今年莊頭神明个頭路，續下來斯係跌米籮，問觀音佛祖莊頭今年个運勢。 頭過莊肚个人係在爐主屋下跌米籮，大家摎神明祈求保護歸莊頭平安，續等在金爐頭前用金紙點火在米籮頂 幾圈，淨化米籮。過來主祭个人會摎神明說明這下愛問个係麼个，續下來斯用點火个金紙在米籮肚捩幾輪，斯交代人拿去屋後背，出力向屋面前个坪仔擲過去。米籮飛過屋崠頂，向前跌落頭前个坪仔，緊輪緊輪4，老老嫩嫩、大大細細摎坪仔尖到淰淰，大家帶等萬分个期待等結果。 擲過來个米籮若係開口向天，斯係代表來年運勢會好、會豐收；米籮係倒覆5斯表示收成毋好；米籮若係半倒斯係半好半壞。早期用二十四節氣來問，這下係用舊曆月份來問，先問莊頭事，像「正月十五蒔早冬禾好無？」像舊年斯跌出尾冬地豆，大暑前好、大暑後半收；高麗菜，七月好，十月毋好這兜。人有流年，農作物該年度乜有好壞，莊肚老者講跌米籮出來个結果斯係「當道」，代表種菜个流年。跌米籮代表先民在艱難時代求生活、求神明保護，用跌米籮代表千千萬萬个希望，逐隻飛對屋崠過來个米籮斯代表一隻希望，希望歸莊頭平安、來年豐收好過日。 1 禾熱病：音 vo ngiedˋ piang⁺；稻熱病。發病時稻葉形成褐色，穀粒不充實或為空包彈，嚴重時葉片枯萎甚至整株枯死。 2 水汴頭：音 shuiˊ banˋ teu；原指控制水流的水閥，此處指地名。 3 跌爐主：音 died lu zhuˊ；擲聖筊以決定下次奉侍神明的主事者。 4 緊輪緊輪：音 ginˊ linˇ ginˊ linˇ；一直滾動貌。 5 倒覆：音 doˇ pug；倒蓋著。 __________________________ (四縣腔) 雖然講一分打拚，一分收成，毋過對耕種人來講，過多个係看天食飯！順風順雨大豐收，真歡喜，毋過係堵著壞價，該就無採工，價數便宜到像豬屎無人愛。係堵著天旱、禾熱病1、做風搓，做一下聚概無好收成就正式慘。天時恁熱，乜係愛在田坵拚勢做事，大粒汗、細粒汗緊流無停，對後生拚到老，對打早做到暗，做到看人面毋著2。聚概係為著想愛過過好一息个生活。對海脣到平洋，一哪仔都有廟，分百姓个心靈有一個寄託个所在。 水汴頭3，一個樸實个詔安客莊頭。祖先在清朝康熙時代就過來臺灣，在這生活。為著求平安，望著好收成，這個莊頭有一個流傳百過年、盡特別个風俗──跌米籮。講起米籮，係頭擺耕種人定著會用著个傢伙頭。無論係㧡穀、㧡菜、㧡番薯、㧡番豆都會用著。水汴頭个崇賢寺每年个正月半這日暗晡，歸莊頭个人聚概來到崇賢寺。一起勢，大家來跌爐主4同四個頭家，負責今年莊頭神明个頭路，接下來就係跌米籮，問觀音佛祖莊頭今年个運勢。 頭擺莊項个人係在爐主屋下跌米籮。大家同神明祈求保護歸莊頭平安，接下來在金爐頭前用金紙點火同米籮㐁㐁啊5，淨化米籮。過來，主祭个人會同神明說明這下愛問个係麼个，續下來再用點火个金紙在米籮个內緣拂幾下轉，就交待人拿去屋下後背，大力對禾埕擳過去。米籮飛過屋頂，向前跌落禾埕，緊輾緊輾，老老嫩嫩、大大細細同禾埕尖啊滿滿，大家帶等萬分期待等結果。 擳過來个米籮係開口向天，就係代表來年運勢會好、會豐收；米籮若倒覆6，就係欠收；米籮係半倒，就係半好半壞。早期用二十四節氣來問，現時係用舊曆月份來問，先問莊頭事，像「正月十五種早冬禾好無？」像舊年仔就跌出尾冬番豆，大暑前好、大暑後半收；高麗菜，七月好，十月毋好這兜。人有流年，農作物該年度乜有好壞，莊項个老人家講，跌米籮出來个結果就係「當道」，代表種菜个流年。跌米籮，代表先民在艱難時代求生活、求神明保護，用跌米籮代表千千萬萬个希望，每一個飛過屋頂過來个米籮就代表一個希望，希望歸屋下平安、來年豐收好過日。 1 禾熱病：音 voˇ ngiad piang；稻熱病。發病時稻葉形成褐色，穀粒不充實或為空包彈，嚴重時葉片枯萎甚至整株枯死。 2 看人面毋著：音 kon nginˇ mien mˇ doˋ；喻工作到非常晚，天色暗得不見人臉。 3 水汴頭：音 suiˋ banˊ teuˇ；原指控制水流的水閥，此處指地名。 4 跌爐主：音 diedˋ luˇ zuˋ；擲聖筊以決定下次奉侍神明的主事者。 5 㐁㐁啊：音 leˇ leˇ aˋ；原意為舔一舔，此處指用金紙的火舌將米籮烘一遍以達淨化目的。 6 倒覆：音 doo^ puˊ；倒蓋著。 __________________________ (南四縣腔) 雖然講一分打拚，一分收成，毋過對耕種人來講，過多个係看天食飯！順風順雨大豐收，真歡喜，毋過係堵著壞價，該就無採工，價數便宜到像豬屎無人愛。係堵著天旱、禾熱病1、做風搓，做一下聚概無好收成就正式慘。天時恁熱，乜係愛在田坵拚勢做事，大粒汗、細粒汗緊流無停，對後生拚到老，對打早做到暗，做到看人面毋著2。聚概係為著想愛過過好一息个生活。對海脣到平洋，一哪仔都有廟，分百姓个心靈有一個寄託个所在。 水汴頭3，一個樸實个詔安客莊頭。祖先在清朝康熙時代就過來臺灣，在這生活。為著求平安，望著好收成，這個莊頭有一個流傳百過年、盡特別个風俗──跌米籮。講起米籮，係頭擺耕種人定著會用著个傢伙頭。無論係㧡穀、㧡菜、㧡番薯、㧡番豆都會用著。水汴頭个崇賢寺每年个正月半這日暗晡，歸莊頭个人聚概來到崇賢寺。一起勢，大家來跌爐主4同四個頭家，負責今年莊頭神明个頭路，接下來就係跌米籮，問觀音佛祖莊頭今年个運勢。 頭擺莊項个人係在爐主屋下跌米籮。大家同神明祈求保護歸莊頭平安，接下來在金爐頭前用金紙點火同米籮㐁㐁啊5，淨化米籮。過來，主祭个人會同神明說明這下愛問个係麼个，續下來再用點火个金紙在米籮个內緣拂幾下轉，就交待人拿去屋下後背，大力對禾埕擳過去。米籮飛過屋頂，向前跌落禾埕，緊輾緊輾，老老嫩嫩、大大細細同禾埕尖啊滿滿，大家帶等萬分期待等結果。 擳過來个米籮係開口向天，就係代表來年運勢會好、會豐收；米籮若倒覆6，就係欠收；米籮係半倒，就係半好半壞。早期用二十四節氣來問，現時係用舊曆月份來問，先問莊頭事，像「正月十五種早冬禾好無？」像舊年仔就跌出尾冬番豆，大暑前好、大暑後半收；高麗菜，七月好，十月毋好這兜。人有流年，農作物該年度乜有好壞，莊項个老人家講，跌米籮出來个結果就係「當道」，代表種菜个流年。跌米籮，代表先民在艱難時代求生活、求神明保護，用跌米籮代表千千萬萬个希望，每一個飛過屋頂過來个米籮就代表一個希望，希望歸屋下平安、來年豐收好過日。 1 禾熱病：音 voˇ ngiad piang；稻熱病。發病時稻葉形成褐色，穀粒不充實或為空包彈，嚴重時葉片枯萎甚至整株枯死。 2 看人面毋著：音 kon nginˇ mien mˇ doˋ；喻工作到非常晚，天色暗得不見人臉。 3 水汴頭：音 suiˋ banˊ teuˇ；原指控制水流的水閥，此處指地名。 4 跌爐主：音 diedˋ luˇ zuˋ；擲聖筊以決定下次奉侍神明的主事者。 5 㐁㐁啊：音 leˇ leˇ aˋ；原意為舔一舔，此處指用金紙的火舌將米籮烘一遍以達淨化目的。 6 倒覆：音 doo^ puˊ；倒蓋著。

11. 

    14 Jan 2022

    【卡拉Hakka】山摎田（山與田）--解釋&教唱--2022.01.12

    山摎田（山與田）--謝宇威 詞：馮輝岳；曲：李泰祥 山摎田 作詞：馮輝岳 作曲：李泰祥 近近个水田 一坵1坵相連 遠遠个山崗 一層又一層 影仔映2 到田中央3 遠山像在涯面前 山摎田 [1]kiuˊ(四) / kiuˋ(海):田的單位 【註】大坵(四縣):旱田 [2] iangˋ(四) / rhangˊ(海) [3]dungˊongˊ(四)/dungˋongˋ(海) 【註】 白讀:dungˊongˊ(四) dungˋongˋ(海) eg.半中央、田中央…… 文讀:zungˊiongˊ(四) zhungˋrhongˋ(海) eg.中央政府、中央銀行 解釋&教唱 日期：2022.01.12

12. 

    10 Jan 2022

    【客語朗讀會】110 年全國語文競賽客家語朗讀文章高中學生組 編號 1 號 【遠方个人客】海陸腔、四縣腔、南四縣腔-- 2022.01.08

    客語朗讀，彭月春老師指導 110 年全國語文競賽客家語朗讀文章高中學生組 編號 1 號 【遠方个人客】劉玉蕉原作 （海陸腔） 毋知對哪日起勢，屋簷下恬索索咧！打早，大門吂開，心肝斯掛吊等該烏烏个身影，會入目珠來無？地泥下有屎好清無？門一開，探頭看著个係失望，𠊎等啊等仔，日頭慢慢仔徙步，晟到門檻來咧，空空个鳥竇，等毋著佢个主人，𠊎，等毋著𠊎个人客。 春天，係造物者變奇術个季節。空氣肚還留有冷天个味緒，還較多个係春天个燒暖，清風撩人，在榮榮个花、嫩嫩个葉莖之間流連，蜂仔摎蝶仔也跈等歡喜採蜜！佢帶來生命，該，係毋係乜會帶來遠方个人客？𠊎日望夜想，出入大門時節，總會探頭看下，祈求該遠方个人客，千萬毋好毋記得自家个舊竇。 一陣吱啁聲對屋簷下傳來，歸屋人躘等出去₁，頭昂昂看該熟事个身影，舊年个燕仔尋轉來咧，斯停在佢兜舊年結个鳥竇肚，兩隻烏烏个頭那探出來，四蕊目珠摎𠊎兜對看，算係相借問咧！𠊎兜有摎老朋友見面个歡喜，佢兜用清清亮亮个吱啁聲來回應！過後幾日，屋簷下當鬧熱，觜町銜泥个烏影，咻下出、咻下落，舊竇个上層，緊沿緊大、緊結緊高，會揬天篷哩喲，阿姆講：「愁麼个，佢兜毋會比你較戇啦！」係喲，恁遠地方尋得著路轉、會起屋戴，還毋會屙下來，𠊎正經輸悿悿哦！ 拶腹个鳥竇結到差毋多咧，日時頭兩隻燕仔輪流飛出去絡食，夜來一隻在竇肚，一隻跍在竇脣。阿姆講：「佢兜輪等在該孵卵哦！」正經，成半個月過，斯聽著幼幼个細燕仔聲咧，總共有四隻，鳥公摎鳥嫲出去尋食該下，佢兜會乖乖在竇肚等，一聽著爺哀銜蟲仔轉竇个聲哨，嘴斯擘大大搶愛食，做爺哀儕一輪過一輪飛出飛入，四張嘴像無底个深坑樣，逐到都嘴擘大大啾啾滾討食，奇怪个係，爺哀仰會知哪隻餵過、哪隻吂食？ 細燕仔生幼毛咧，媸媸个頭那殼長下弄啊弄仔探出鳥竇來，鳥公、鳥嫲跈等日頭个腳步還係飛出飛入，無閒直掣。細燕仔一日一日大，膴身个羽毛對灰色慢慢轉成烏金个翼毛該下，鳥公、鳥嫲斯會半拐半監佢兜學飛，這時節屋簷下盡鬧熱，乜係𠊎兜當歡喜个時節。慢慢仔，這綱細燕仔自家會絡食咧，斯恁樣生命又再過循環一到，生生不息。承蒙這竇燕仔，分𠊎兜體會著生活中个生趣事，同時乜感受著有阿爸阿姆守顧个幸福。 1 躘等出去：音 liungˇ nenˊ chud hiˇ；衝著出去。 __________________________ (四縣腔) 毋知對哪日起勢，屋簷下恬索索咧！打早，大門吂開，心肝就掛吊等該烏烏个身影，會入目珠來無？地泥下有屎好清無？門一開，探頭看著个係失望，𠊎等啊等，日頭定定仔徙步，晟到戶檻₁來吔，空空个鳥竇，等毋著厥主人，𠊎，等毋著吾人客。 春天，係造物者變奇術个季節。空氣裡肚還囥等有寒天个味緒，過較多个係春天个燒暖，清風撩人，在榮榮个花、嫩嫩个葉莖之間流連，蜂仔同蝶仔也跈等歡喜採蜜！佢帶來生命，該，係毋係乜會帶來遠方个人客？𠊎日望夜想，出入大門時節，總會探頭看一下仔，祈求該遠方个人客，千萬毋好毋記得自家个舊竇。 一陣啾啾滾个聲音對屋簷下傳來，歸屋下人縱2等出去，頭臥臥仔看該熟事个身影，舊年个燕仔倒轉來吔，就停在佢兜舊年結个鳥竇項，兩粒烏烏个頭那探出來，四蕊目珠同𠊎兜對看，算係相借問咧！𠊎兜有同老朋友見面个歡喜，佢兜用亮亮个啾啾聲來回應！過後幾日，屋簷下異鬧熱，觜項銜泥个烏影，咻啊出3、咻啊入，舊竇个上層，緊沿緊大、緊結緊高，會揬著天篷哩喲，阿姆講：「愁麼个，佢兜毋會比你較戇啦！」係唷，在恁遠个所在都尋得著路來轉、會起屋歇，還毋會分佢屙下來，𠊎正經輸悿悿哦！ 拶腹个鳥竇結到差毋多吔，日時頭兩隻燕仔輪流飛出去絡食，夜來一隻在竇肚，一隻跍在竇脣。阿姆講：「佢兜輪等在該孵卵哦！」正經，成半個月過，就聽著幼幼仔个細燕仔聲咧，總共有四隻，鳥公同鳥嫲出去尋食該下，佢兜會乖乖在竇肚等，一聽著爺哀銜蟲仔轉竇个聲說4，嘴就擘大大搶愛食，做爺哀儕个一輪過一輪5飛出飛入，四張嘴像無底深坑樣仔，逐到都嘴擘到大大啾啾滾討食，怪奇个係，爺哀仰會知哪隻餵過、哪隻吂食？ 細燕仔生幼毛吔，媸媸个頭那殼不時弄啊弄欸探出鳥竇來，鳥公、鳥嫲跈等日頭个腳步還係飛出飛入，無閒洎杈。細燕仔日日大，圓身个幼毛對灰色慢慢轉做烏金个翼毛該下，鳥公、鳥嫲就會半拐半監佢兜學飛，這時節屋簷下盡鬧熱，乜係𠊎兜盡歡喜个時節。定定仔，這竇細燕仔自家會絡食哩，就恁樣生命過再循環一到，生生不息。感謝這竇燕仔，分𠊎兜體會著生活中个生趣事，同時乜感受著有阿爸阿姆守顧个幸福。 1 戶檻：音 fuˇ kiamˊ；門檻。 2 縱：音 jiungˊ；身體猛力向前或向上。 3 咻啊出：音 xiu a cudˋ；箭速般往外飛。 4 聲說：音 sangˊ sodˋ；聲音。 5 一輪過一輪：音 idˋ linˊ go idˋ linˊ；一趟又一趟。 __________________________ (南四縣腔) 毋知對哪晡日起勢，屋簷下恬索索吔！打早，大門還無開，心肝就掛吊等該烏烏个身影，會入目珠來無？地泥下有屎好清無？門一開，探頭看著个係失望，𠊎等啊等仔，日頭緩緩仔徙步，晟到戶檻來吔，空空个鳥竇，等毋著厥主人，𠊎，等毋著𠊎个人客。 春天，係造物者變奇術个季節。空氣裡背還留有寒天个味緒，過加多个係春天个燒暖。清風撩人，在榮榮个花、嫩嫩个葉莖之間流連，蜂仔同揚蝶仔乜跈等歡喜採蜜！佢帶來生命，該，係毋係乜會帶來遠方个人客？𠊎日望夜想，出入大門个時節，總會探頭看一下，祈求該遠方个人客，千萬毋好毋記得自家个舊竇。 一陣啾啾聲對屋簷下傳來，歸屋人舂出去，頭臥等仔看該熟事个身影，舊年个燕仔尋歸來吔，就停在佢等舊年結个鳥竇項，兩粒烏烏个頭那探出來，四蕊目珠同𠊎等對看，算係相借問吔！𠊎等有同老朋友見面个歡喜，佢等用清清亮亮个啾啾聲來回應！過後幾日，屋簷下盡鬧熱，觜項銜泥个烏影，喊等出、喊等入，舊竇个上層，緊延緊大、緊結緊高，會揬天篷吔喲，阿姆講：「愁麼个，佢等毋會比你過戇啦！」係喲，恁遠所在尋得著路歸、會起屋歇，還毋會屙下來，𠊎正經輸啊盡悿哦！ 貼實个鳥竇結啊差毋多吔，日時頭兩隻燕仔輪等飛出去絡食；夜來一隻在竇項，一隻跍在竇脣。阿姆講：「佢等輪等在該孵卵哦！」正經，成半個月過，就聽著幼幼个細燕仔聲吔，總共有四隻。鳥公同鳥嫲出去尋食該下，佢等會乖乖在竇項等，一聽著爺哀銜蟲仔歸竇个聲說，嘴就擘大大搶愛食。做爺哀个一轉過一轉飛出飛入，四張嘴像無底个深坑樣仔，每一擺都嘴擘啊大大、啾啾滾討食，怪奇个係，爺哀仰會知哪隻餵過、哪隻還無食？ 細燕仔生幼毛吔，媸媸个頭那殼不時弄啊弄仔探出鳥竇來，鳥公、鳥嫲跈等日頭个腳步還係飛出飛入，無閒洎杈。細燕仔一日一日大，圓身个鳥毛對老鼠色慢慢轉做烏金个翼毛該下，鳥公、鳥嫲就會半拐半監佢等學飛，這時節屋簷下盡鬧熱，乜係𠊎盡歡喜个時節。慢慢仔，這綱細燕仔自家會絡食吔，就恁呢生命過再循環一到，生生不息。多謝這竇燕仔，分𠊎體會著生活中个生趣事，同時乜感受著有阿爸阿姆守顧个幸福。

13. 

    7 Jan 2022

    【卡拉Hakka】若个名仔像一首詩 （你的名字像一首詩）--解釋&教唱-- 2022.01.05

    若个名仔像一首詩 (你的名字像一首詩) 羅文裕 feat.彭佳慧 詞/曲 羅文裕 著白 T-Shirt 摎短褲 去花海散步1 在涼風中跳舞 忽然2落下了大雨 打亂了腳步 心跳在加速3 面紅紅看等你 涯恬恬看等你 想愛講 若4个名仔像一首詩5 涯像詩人 為你鍾情 分創作6靈感包圍 若个名仔像一首詩 天空个雲 畫出愛心 唱出愛个旋律7 [1]pu(四) / pu+ (海)【注意】不念 bu 喔! [2]fudˋienˇ(四)/ fud rhan(海) 【同義詞】 1.旋(旋)風:hienˇfungˊ(四) hien fungˋ(海) 2.𢫦𢫦風: mag mag fungˊ(四) magˋ magˋ fungˋ(海) [3] sugˋ(四)/ sug(海)【註】速度:sugˋ 「tu」(四) sug 「tu+」(海) [4] ngiaˊ(四) / ngia (海):你的 [5] siiˊ(四) / shiˋ(海) [6] cong zogˋ(四) / chongˇ zog(海) [7]lid(四)/ ludˋ(海) 【注意】四縣、海陸發音變化不規則!

14. 

    10 Dec 2021

    【卡拉Hakka 】三姑个鹹水雞-解釋&教唱- 2021.12.08

    三姑个鹹水雞--邱廉欽 簡介: 阿 Kim 的媽媽在竹北的傳統市場擺攤賣鹹水雞。這首歌為描繪其母親在做生意叫賣、招攬客人的情景。 (冷知識:阿 Kim 的媽媽姓【房】;【房】當姓氏時，客語發音為 【piong(海)/piongˋ(四)】) 詞/曲:邱廉欽 歡迎來到鬧熱个市場 這搭仔1當多人來排2攤仔 賣食个 賣著3个 還有各種各樣个盡多 你尋到有間路脣4當出名 (啊）有人安著5三姑个鹹水雞 這兜好食無(當好食喔) 好食嗎(你食看喔) 好食無 (毋會騙人啦) 好食無 你盡量買 𠊎算你便宜6兜仔 鹹水雞 鹹水鴨仔 豬肉鵝肉切兩盤 你看東西當多 還愛食麼个 大豬腳 細煙腸 魚仔小炒袋起來 點心全部摎𠊎買 毋使煮咧 炆7筍乾 豆腐干 排8骨牛肉張9一碗 你看東西當多 你好食麼个 分你食到當健 當合算10當有衛生 (賣淨11忒咧) 1 liaˊ dabˋ er (海)/ iaˋ dab eˋ(四):這裡 2 bai(海) / baiˇ(四) 3 zhog(海) / zogˋ(四) 4 shun(海) / sunˇ(四):邊緣 eg.河壩脣、海脣 5 onˋ doˇ(海) / onˊ do (四):稱為;名叫 6 海陸腔「便宜」發音 pien ngi，四縣音標為 pienˇngiˇ， 但口語上，講便宜時，「宜」習慣發成 nginˇ的音。 7 vun (海) / vunˇ(四):用小火慢煮 8 pai(海) / paiˇ(四) 9 zhongˋ(海) / zongˊ(四):準備 10 gab sonˇ(海) / gabˋ son 11(四) ciang+(海) / qiang(四):乾淨;一點都不剩

Contact 客家國 Hakka Nation

Guest appearances

Does not typically book guests

Based on episode analysis; this does not confirm that the show is currently accepting guests.