Прыйшоў час запытаць, чаму традыцыйна лічыцца, што беларуская літаратура моцная ў апісанні вайны і прыроды, а хутчэй бездапаможная і стэрыльная ў апісанні цялеснасці, сексуальнасці і інтымнасці? Беларуская квір-літаратура ўжо робіць свае першыя крокі і гэта – цікавая і важная з’ява.
Анталогія беларускага гей-пісьменства сабрала ўсё, што на гэты момант вядома пра гэты пласт нашай літаратуры. Яна рыхтавалася амаль 5 гадоў, аўдыяверсія - амаль год! Вынік – наватарская і прыгожая калекцыя тэкстаў, якія адкрываюць нам яшчэ адно вымярэнне саміх сябе.
Прэзентацыя кнігі адбылася на фестывалі інтэлектуальнай кнігі PRADMOVA 7 кастрычніка 2023 года. Аўдыяверсія створаная ў рамках праекту «Народная кніга», дзякуючы супольным намаганням аўдыявыдавецтва audiobooks.by, выдавецтва «Скарына», пры ўдзеле выдаўніцы аўдыякніг Крысціны Дробыш.
Звяртаем вашу ўвагу. У творах можа прысутнічаць абразлівая лексіка, апісанне сексуальных стасункаў, гвалту, прастытуцыі, палення цыгарэтаў, ужывання алкаголю і наркотыкаў. Прыгадваецца ўстанова, прызнаная беларускімі ўладамі так званым «экстрэмісцкім фармаваннем».
Праект «Народная кніга» – гэта ініцыятыва аўдыявыдавецтва audiobooks.by і выдаўніцы аўдыякніг Крысціны Дробыш, у якой абсалютна кожны і кожная, незалежна ад досведу і навыкаў, могуць узяць удзел у запісе сапраўднай кнігі. Праект з'явіўся ў 2021 годзе. Тады больш за сто ўдзельніц і ўдзельнікаў запісалі аўдыёверсію кнігі «Мова 404» Аліны Нагорнай.
Чытае: беларусы і беларускі