Mir, de Chris an de Pier, maache Podcast. Et ginn der einfach nach net genuch. 100% ongefilterte Chaos Podcast mat Humor, Real Talk an de beschte Gäscht. Nei Episod all 1. Méinden am Mount. Vill Spaass beim Lauschteren!
Nach méi op Instagram: ongefiltert.podcast
Yoga am Minett, do wou jiddereen*t wëllkomm a nach vill méi ewéi laachen erlaabt ass - mam Zoé Galassi a Sally Grüneisen
Wat sech esou aus engem Iessen entwéckele kann: nodeems d'Zoé d'Sally invitéiert hat, war et kloer dass si Yoga am Minett géinge grënnen. No scho siwe Joer gëtt et dofir genuch ze zielen. A gelaacht hu mir och vill — ënnert anerem beim spontane Laachyoga. Et stellt sech eigentlech just nach d'Fro wéini de Chris eemol mat geet fir dass de Pier him Child's Pose ka weisen. Bock matzekommen?
5 Oct 2026
Een oder méi Loch Ness'en a schwaarz Kazen, déi lafen, an dat am Léifsten am Bësch an an de Bierger - mam Alain Scheuer
Säin Fussballtrikot mat der Nummer 13 huet den Alain scho viru Joren ewech gepak. D'Lafe steet dofir awer reegelméisseg um Programm — am Léifsten Trails. An der Leef huet hien der schonn eng Jett erof. Et geet him och net duer just ze lafen an nieft sengem eegene Lafgrupp, de Black Cat Runners, organiséiert hien aktuell säin éischte 24H-Backyard trail zu Käerch. Enn des Mounts ass et esou wäit an et ass derwäert kucken ze kommen! Keng Angscht an dëser Episod geet awer net just ëm d'Lafen. Den Alain hat vill "Géigestänn" dobäi a Biolog ass hien och net. Merci Alain fir däin zweeten Optrëtt bei eis! P.S.: Sicht kee Video op Instagram, well eis Kamera war midd.
7 Sept 2026
Ni langweileg an ëmmer cool, en neie Rekord un Shout-outs a komm mir sinn all méi ewéi de Mathis - mam Nicole Bausch
Wou soll een do ufänken? Mam Nicole aka Nicool aka Nikki Ninja gëtt et definitiv net langweileg a mir feieren eng cool Episod mat villen Themen an nach méi Shout-outs un aner Museker an an an. Gär mat zielen an onbedéngt vum Mathis léieren - d'Welt wier eng besser wa mir all esou wieren ewéi hien! Merci dann och fir d'Traumabewältegung wéinst der verluerener 3-Eechelen-Episod. P.S.: De Chris schëllegt eis all eng Kopplabunz!
21 Aug 2026
Eis Trilogie-Finall: déi grouss Fail Review, eng wichteg Reklamm an e bësse méi - Summer Sessions 2026 (3/3)
Den éischte Fail vun dëser Episod: se kënnt net den 19/08, mee den 21/08 raus. Soss gouf et nach aner Fails am Laf vun der Zäit iwwert déi mir an dëser Episod schwätzen. Fir de Rescht weidert Gelabberts iwwert déi verlueren Epsiod, Sport,... an eng Reklamm fir eisen allerbeschter Summer Sessions Support, Ortea!
3 Aug 2026
Vum Éierefan zum spontane Gaascht an säin Afloss wisou et eise Podcast iwwerhaapt gëtt - mam Anne Hierzig
Hat war dat Éischt wat sech op eise spontanen Opruff gemellt huet a mir si frou doriwwer: d'Anne ass net just ee grousse Fan, mee och iergendwou schold, dass mir iech mat dësem Podcast nerven. Doriwwer a villes méi, kanns du hei lauschteren. Ass och vill besser ewéi all Héierbuch. Merci Anne an och un all aner Persoun, déi dobäi wollt sinn. Bis ganz geschwënn!
17 Jul 2026
Ee Special am Special: live vum Beautiful Decay mat siwe fantastesche Gäscht - Summer Sessions 2026 (2/3)
Déi zweet Summer Session hu mir eis et net konnten huele loossen awer déi eng oder aner Persoun un de Mikro ze huelen. Den drëtten Dag um Beautiful Decay gouf et einfach ze vill ze zielen an ze froen. Siwe Gäscht - dat hannerteneen. Mam Alain Welter hu mir eise léifste Kënschtler vum Festival kuerz zu Wuert komme gelooss. D'Laure Cales an den Alain Scheuer, déi sech ëm de Samschdes- a Sonndes-Moies-Sport gekëmmert hunn, dropen dann bei eis exklusiv ee super gemeinsaamt Event. D'Roxane Swiercz an den Damien Giudice (Boy From Home) erzielen aus dem Craftwork Village a verkafe weider gemitterlech wärend der Opnam hier Konscht. An zum Schluss sinn et den Dany Coimbra an de Bob Feltgen mat deenen mir iwwert hir Comebacks schwätzen - Los Dueños ass zeréck a vläicht kënnt et zu enger Crossover Episod mam Gebraddels a Gesabbels Podcast. Wat een Dag. Wat ee Festival. Merci, et war immens schéin!
6 Jul 2026
Vill Geschichten, ee super Programm an herrlech Leit um Rudder vun engem geniale Festival - mat der Beautiful Decay Crew
Véier Gäscht op ee Coup - dat war nei a brauche mir all net all Kéiers. Maach dech op vill Chaos gefaasst! Et war awer definitiv derwäert a mir haten esou vill Spaass! Mam Thierry, Marc, Damien a Max schwätze mir iwwert de Beautiful Decay, ee Festival den een dierf erlieft hunn. Vum 10. bis den 12. Juli zu Käerch am Schlass ass the place to be. Eis fënns du och do - Sonndes, den 12/07 - a wann's du léif bass dierfs du Gaascht bei eis sinn. Mir freeën eis!
19 Jun 2026
Wat ee Start an eis Rees: mir feieren sechs Méint Podcast a kucken zeréck - Summer Sessions 2026 (1/3)
Yuhu, sechs Méint Ongefilterte Chaos! Dat muss gefeiert ginn – a wéi geet dat besser wéi mat der éischter vun eisen dräi Summer Sessions? Zu zwee kucke mir op eis éischt Podcast-Méint zeréck, gi Feedback zu ärem Feedback a verdeele Gréiss a Mercien. Kindly supported by Ortea
1 Jun 2026
Alles iwwert eisen neie Lieblingstéi an eng besonnesch Zesummenaarbecht - mam Stephan Kneip
An sengem Büro an/oder Doheem, hu mir de Grënner vun Ortea - de Stephan - vum schaffen ofgehalen. Selten hu mir esou eng motivéiert an éiergäizeg Persoun kennegeléiert! Mee mir ginn net just inspiréiert heem: mir wëssen elo alles iwwert säin Téi, ewéi wichteg him säi Laptop ass, d'Virdeeler vun engem Gilet,... a mir hunn eis éischt Collab an der Täsch. Jo, richteg gelies. Du wëlls méi wëssen? Dann vill Spaass beim Lauschteren! Een Tipp: mat enger kaler Ortea genéisst se sech nach besser. Stephan, mir gesinn eis an fënnef Joer!
4 May 2026
Onpreparéiert am Schluechthaus mat Picon Béier an Anekdote vu fréier - mam Vic Bové
Okay vläicht hu mir awer net alles krass anescht gemaach: mir waren nees net wierklech preparéiert a mir haten erëm ee super sympathesche Gaascht. Mam anscheinend eenzege Vic hu mir eis iwwert seng Musek an déi gutt al Zäite verlabert - Jo, mir hu schonn erëm eng nei längsten Episod. Dëst am Hollerecher Schluechthaus ëmgi vu Konscht a Kultur. An dat mat Waasser, ahh nee Kaffi, oder awer Picon Béier. D'Geschichte sinn zum Deel wouer, anerer net. Wien weess dat schonn. Vill Spaass beim Lauschteren, och vum V.I.C senger Reimkickkonscht!
In loving memory of Pascal vu Wooltz.
6 Apr 2026
Vun der Long op Zong mam Diddelenger Jong iwwert esou vill dass mir vergiess hunn iwwert wat - mam Yannick Schumacher
Zeréck zu Diddeleng an dat mam Yaya. Gutt, dass hien eis spontan gerett huet, soss wiere mir ouni Gaascht an ouni Location gewiescht. Dorunner huet d'Qualitéit vun der Episod awer guer net gelidden. Eis nei Rekord-Episod ass net just déi längsten, mee warscheinlech huet och nach ni een esou séier esou vill gezielt ewéi hien. Wann dat keng Loscht mëscht ze lauschteren oder d'Wierder ze zielen, wësse mir et och net. Mir soen eisem 'Man of Steel' Merci! Btw: Mir waren am Amarcord a kënnen de Veggie Burger empfeelen. De Limoncello ass och gutt!
2 Mar 2026
Am Beet iwwert Content Creation, Reklammen fir eemol alles, Déieren op Inselen a ganz vill méi - mam Cecilia Said Vieira
Dat huet Spaass gemaach! Eng Episod iwwert Podcast a Social Media, Reklammen ënnert anerem fir Capri Sonne, ewéi een sech am Beschte Moie seet, dem Ceci seng rosa Switch a wat hat am Léifste spillt, wien am Meeschten "absolut" gesot huet,… Gars, hei gëss du vill gewuer! Merci un dech fir d’Lauschteren an un de Restaurant Beet fir de super Accueil.
2 Feb 2026
Bei lafendem Betrib mat Iessen a Wäin, iwwert d'Boxen, staark Argumenter a ganz perséinlech Ablécker - mam Dany Zenari
Eng Freed an eng Éier den Dany Zenari als éischte Gaascht an eisem Podcast ze hunn. Mir si vill iwwert säi Restaurant, de Rucolino, gewuer ginn, wëssen elo wie wéini géint wie geboxt huet an nach vill méi. Lauschteren, lauschteren, lauschteren!
5 Jan 2026
Chris & Pier 3.0, déi éischt penibel Geschichten, de Kakadude an de Biodreck
Léif, dass du hei méi iwwert d'Episod liese wollts. Mir roden dir un d'Episod ganz séier ze lauschteren an déi gewonnen Zäit ze notzen eis ze followen a Feedback ze ginn. Merci am Viraus!
15 Dec 2025
Teaser
Teaser, Teaser, bla bla bla
Reach and audience
Public platform figures. Ratings count people who left a rating, not total listeners.
Spotify
5.0 / 5
2 ratings
Contact Ongefiltert Podcast
Guest appearances
Books guests
Based on episode analysis; this does not confirm that the show is currently accepting guests.
Host of Ongefiltert Podcast?
Claim your podcast to manage its listing and keep your show details accurate.
Pod Engine is an independent podcast discovery and analytics service and is not affiliated with or endorsed by this podcast. Artwork and show content belong to their owners. Full legal notice.
Explore this show Podcast research with Pod Engine
