15 Episodes
2024 First episode About 運動小學堂 《運動小學堂》邀請囡仔兄、囡仔姊，那聽Podcast、那運動。佇咱的節目內底，咱有小學堂運動主任黃國洲，提供咱上專業的運動智識；班導師阿旻和班長張詠皓共同出體育題目，用上趣味的對話方式，紹介運動的歷史，和運動小常識。
前往＞＞央廣臺灣台語迷眾頁 (https://www.facebook.com/rti.taigi)
聽友來函： (mailto:17rti@rti.org.tw) 17rti@rti.org.tw (mailto:17rti@rti.org.tw)
Publisher 張詠皓, 黃國洲, 曾偉旻, Rti
Category government · society & culture
Language zh
Explicit No
First episode 10 Apr 2024
Latest episode 29 Apr 2024 Latest episodes 15 episodes in the feed.
29 Apr 2024
《運動小學堂》EP15:帕運會精神 第一改、第二改世界大戰以後，全球出現袂少身障軍民，所以復健治療嘛開始被重視。1948年，一位醫生佇英格蘭為二戰跤脊受傷的軍人，組織一个運動競賽團體，佇倫敦奧運開幕仝工佇病院，舉行頭一改的運動會，被認為是帕運會的起源，四冬了後，荷蘭開始有人加入這个運動會。頭屆帕拉林匹克運動會佇咧1960年羅馬舉行，干焦400外名運動員參加，2000年雪梨帕運會中，已經有超過4,000名運動員參加。
咱臺灣嘛愈來愈重視，臺灣教育部體育署頭改安排帕運選手，長期進駐國家運動訓練中心，佇遮會當受著較完善的後勤支援，才通安心備戰，進一步瞭解帕運選手們的個別需求，親像講，食食愛講究，對跤脊受傷的選手來講，腰子監控真重要、長期高強度集訓，愛捷捷監控啉水量佮尿液生化指數，確保腰子功能無受損蕩。帕運選手過去參賽無送餐佮疲勞恢復的服務，嘛欠泌尿科醫師佮物理治療師綴佇咧邊仔，這陣體育署攏有通盤的規劃，向望做上好的安排，幫助帕運選手提獎牌、圓金牌夢。體育就是愛「鼓勵每一款族群攏會當參與運動」，這就是“平權”啦。巴黎帕運的Slogan是「Games Wide Open」，期待選手備戰、參賽、競賽精彩表現，咱嘛愛創造閣較包容、閣較融合的社會，做伙支持身心障礙運動平權。
29 Apr 2024
運動小學堂EP14：特色小學攻頂玉山運動課 無仝款的體育課！
新北市三峽區插角國小得著教育部體育署「卓越登峰獎-金推獎」的肯定，這間「森林小學」予一年仔新生就開始peh山，除了運動更加推廣山林教育，嘛予peh山運動成做學生新的 DNA，提升in的韌性。
自學校後山，630米懸的小山開始，進階到三峽五寮尖山，這時就愛跤手並用，五年仔以上閣愛通過「峭壁雄風」的挑戰。畢業典禮除了佇咧學校禮堂舉辦，另外一个行程就是peh玉山。自入學到畢業，一步一步練體能，五年仔就愛先安排看合歡山群峰，熟似高山環境，等待六年仔欲出業的時，就會邀請家長、學生做伙peh玉山，嘛代表小學六年的山林教育、體育成果的總驗收，提升學生自信心。
新北市萬里區野柳國小逐年攏佇咧海王星碼頭，舉辦划獨木舟畢業典禮，2023年更加佇咧海底種海科館捐的200株珊瑚苗，欲來復育海洋生態棲地，予畢業的學生，永遠難忘。金門金湖國小嘛推動獨木舟和SUP的設備，積極推動海洋體驗課程，成做重點基地學校，佇咧倚近水的時陣，予學生囡仔閣較認捌咱的水域。
26 Apr 2024
《運動小學堂》EP13：原住民族運動員正名的故事 臺灣是濟族群組成的國家，原住民雖然干焦佔臺灣總人口的2.5%，不而過濟濟運動的好表現，攏是來自原住民出身的選手。身體素質攏真好，天生閣有真好的爆發力。佇咧棒球場、籃球場頂，攏看會著原住民球員的形影。
這陣臺灣社會鼓勵原住民族恢復家己的族名，臺灣棒球職業球員頭一位改名的是球星陳鏞基，阿基師。2010年透過球團向聯盟申請登錄母語姓名，尾後閣有林智勝、王勝偉、張泰山嘛攏正名過。這陣少年球員閣有吉力吉撈．鞏冠，佇咧美國小聯盟的時，改用排灣族母語姓名Giljegiljaw Kungkuan登錄上場，是臺灣頭一位，用原住民母語姓名，比賽的美國職業球員，後來轉來臺灣加盟味全龍，因為連身分證攏改做族名，成做頭一位漢文、英文攏登錄原住民名姓的選手。吉力吉撈正名效應，佇咧味全龍遮湠開，親像拿莫．伊漾、瑪仕革斯，味全龍隊已經有3名選手用原住民的名登錄喔。
25 Apr 2024
運動小學堂EP12：奧運會VS臺灣奧運英雄 《運動小學堂》除了有詠皓班長、阿旻老師今仔日有新成員加入，是柚仔妹妹。
今仔日欲來講奧運會，自1896年開始，四年舉辦一改，嘛是各國佇咧無仝運動領域的專業運動選手，替國家爭取榮譽的重要時刻。但是真濟人可能毋知影，奧林匹克運動，上早是自古希臘開始。傳說奧運舉辦的起源，是為著宗教慶典，或者是城邦之間的體育競技活動。比賽項目以田徑運動賽跑為主，尾手閣增加摔角（相掩）、拳擊（boxing）、賽馬、跳遠等等的運動項目，彼時上濟有到23項。
佮這陣奧運無仝的所在是，古希臘奧運會，參賽的選手，攏愛有純正的希臘血統，彼時的奴隸、閣有犯罪紀錄、道德記錄無好的人，攏會被禁止參賽。另外也禁止女性參賽，嘛袂當看比賽，演變到這陣，奧林匹克運動會已經較注重性別的平等囉。尤其奧運精神，毋是勝利，顛倒是運動家精神的展現喔。
23 Apr 2024
《運動小學堂》EP11：棒球生存方式：上壘得分 《運動小學堂》班導師：阿旻、班主任：黃國洲
EP11：棒球生存方式：上壘得分
安打、全壘打攏會當幫助球隊展開攻勢，得著分數。有時陣棒球運動嘛會靠對方四粒歹球（ball），觸身球(hit by pitch)、失誤等等，徛起去壘包。拍落分數的棒球勝利方程式按怎組合，緊來聽《運動小學堂》。
22 Apr 2024
《運動小學堂》EP10：棒球出局Out有幾種？ 《運動小學堂》班導師：阿旻、班主任：黃國洲
《運動小學堂》EP10：棒球出局Out有幾種？
棒球運動攻守之間，攻方的球隊被取消摃球、走壘或者是得分的權利，就號做出局(out)。出局按怎產生?刺殺、封殺、接殺按怎分？你閣知影啥物款出局的方式咧？歡迎收聽《運動小學堂》，來聽班主任黃國洲來解釋。
22 Apr 2024
《運動小學堂》EP9：棒球場頂的女性 《運動小學堂》班長：張詠皓、班導師：阿旻、班主任：黃國洲
棒球運動過去攏是男性為主，這陣咱臺灣已經出現頭一名女性的主審，伊是劉柏君，過去捌入選美國《富比世》（Forbes）「國際體壇上有影響力的女性」（The Most Powerful Women in International Sports ）第19名。女性力量佇咧棒球場大爆發，沓沓仔咧改變棒球生態，《運動小學堂》用棒球環遊世界，嘛看棒球中的女性，緊來飛出去。
Luisa Gauci 2021至2022年提著棒球獎學金，嘛得著美國華盛頓州奧本的Green River學院入學允准，Gauci自十二歲開始摃球，這陣佇咧Minor League Baseball小聯盟，因為打擊表現受著肯定，Gauci 去予人提名亞利桑那綜合聯盟（Arizona Complex League）做打擊教練，伊嘛講，「伊佇咧男性為主的運動產業，若準逐家攏先論定伊因為是女性就無法度有表現，伊今仔日就袂有這款的成績。」
閣有一位是Marika Lyszczyk，佇伊十歲的時陣，逐家攏講，伊會使一直拍棒球，14歲時陣，伊感覺講，棒球路已經有限制；15歲的時陣，逐个人攏講煞煞去矣，緊去轉摃壘球。十八歲的時，伊猶無放棄棒球這條路，Lyszczyk隨時間發展， 發現家己棒球摃了比壘球較好。爆發力雖然無講真強，但摃球的能力猶算有水準；伊跍咧蹲捕的時陣，確實擋會牢暴投，傳球力頭嘛好，𤆬領球隊提過勝利。
18 Apr 2024
《運動小學堂》EP8：基層棒球教練“薪”酸酸 《運動小學堂》班導師：阿旻
《運動小學堂》今仔日來到南投縣中正國小，閣有太巴塱國小，來看這兩隊少棒強隊，戰力的組成。
另外，咱嘛欲來關心三級棒球教練月給，因為實在普遍足低、足低的。北部行情有小可仔比較好，比起南部干焦兩萬箍，北部至少猶有三萬起跳，但比較南北生活開銷，橐袋仔其實攏嘛袋磅子（身無分文），負擔真重。若是通考牢正式專任教練，一開始月給，雖三自三萬外箍、接近四萬外起跳，但隨年資上懸坎，會當來到七至八萬元，福利和教師、公務人員差不多，嘛是真濟三級棒球教練的志願。
《運動小學堂》認為教練的薪水愛提升，學員才袂因為一直換教練，中斷練習、犧牲練球穩定的品質，希望教育部會當好好仔看待這个問題。
18 Apr 2024
《運動小學堂》EP.7：棒球中的數學 《運動小學堂》班長：張詠皓、班導師：阿旻、班主任：黃國洲
《運動小學堂》今仔日欲用棒球算數學，尤其棒球按怎贏，拍出勝利方程式，其實攏和數學有關係呢！
1.逐家佇咧國校仔，應該攏有拍樂樂棒球？若準樂樂棒球定點的球，捽（sut）球棍仔的角度，是啥物角度，球會飛上遠？
A. 15度
B. 30 度
C. 45 度
牛頓力學結合數學，水平向頂面仰角差不多45度射出去的球，會飛上遠。
閣來看講啥人是「打擊王」？這就愛考慮「打擊率」，打擊率是咧看選手打擊能力的工具之一，3 成以上基本上就是好的打擊者，若是落到2 成 5 以下，表現就愛閣加油囉，打擊率按怎算咧？
總安打數（包含全壘打），除以總打數；假使詠皓有40个打數，摃出20 支安打，打擊率就是 20 除 40 等於0.5，就通講強打者有5成打擊率。
2.阿旻老師50个打數，有15支安打，10支全壘打？請問阿旻老師的打擊率是偌濟？
答案是啥物趕緊算看覓。（15安打+10全壘打）/50打數＝打擊率？
17 Apr 2024
《運動小學堂》EP6：棒球起源是21分制？ 《運動小學堂》班長：張詠皓、班導師：阿旻、班主任：黃國洲
逐家攏知影這陣棒球拍九局，不而過你敢知影棒球起源是21分制，先得著21分的隊伍，就贏比賽？
看起來是打擊者真厲害，按怎拍就有分數，會當有大比分的比賽。不而過，棒球的演變，投手是愈來愈厲害、比賽的時間嘛愈來愈長。所以講因為時間可能會拖真長，早前的棒球場，彼時猶無夜間照明設備，為著予比賽節奏較緊咧，1856年，史上頭一个紐約的棒球俱樂部（KnicKerbocker Club）「尼克巴克俱樂部」，就出面開會討論棒球規則，決定將比賽定做9局，逐場比賽上場人數9人，予每一个人有機會通上場打擊3改。所以講棒球九局規則的歷史，嘛已經150幾年。
《運動QuizTime》
1.頭拄才佇咱的對話內底，棒球舊規則是用分數來決定上贏上輸？按呢分數愛拍到幾分，才會算贏？
A.21分
B.11分
C.1分
2.咱攏知影棒球的起源是美國，這陣拍九局的規定，三輪27打席的規則，是住美國佗一个城市的棒球俱樂部所定的？
A.舊金山
B.洛杉磯
C.紐約
真簡單，趕緊來《運動小學堂》互動～～
16 Apr 2024
《運動小學堂》EP.5：強打者經典代打滿貫砲 《運動小學堂》班長：張詠皓、班導師：阿旻、班主任：黃國洲
中央廣播電臺《運動小學堂》今仔日欲坐「時光機」，來看真強的Batter、Hitter、閣有上強、上強的代打者，佇咧重要時刻，有關鍵的打擊，幫助球隊提著勝利。尤其，臺灣的職業棒球歷史上，捌出現過266支代打全壘打，其中有14支是滿貫全壘打，英語號做「Grand Slam」，或者是咱通叫伊「滿貫砲」，打者佇咧一壘、二壘、三壘攏有跑者、滿壘的時，摃出去的全壘打，按呢，一口氣會當提著幾分？真簡單，一口氣會當提著4分。
臺灣職業棒球歷史14支代打滿貫全壘打，其中有一支是總教練兼球員的選手摃出去的，你敢知影是啥人咧？這陣咱就欲來坐時光機，來看看經典的代打滿貫砲。「運動小學堂時光機，穿越 Ready GO」！
15 Apr 2024
《運動小學堂》EP4：美國職業棒球MLB 《運動小學堂》班長：張詠皓、班導師：阿旻、班主任：黃國洲
中央廣播電臺《運動小學堂》今仔日欲出國校外教學，𤆬逐家去美國看棒球。講著大聯盟，這陣已經有17个臺灣選手，佇咧MLB出場過。頭一位咱的臺灣巨砲是咱陳金鋒，上新起去MLB的臺灣選手，是今年三月31才，初登板的舊金山巨人隊的投手鄧愷威，屬於大聯盟國家聯盟National League西區的隊伍。1876年成立的國家聯盟「National League」與1901年成立的美國聯盟「American League」所組成，佇咧1903年時兩个聯盟達成協議，正式承認互相佇咧美國職業棒球的對等地位，共同成立大聯盟。
運動小學堂QUIZ TIME：
1.摃球、毋免守備，按呢伊啥物款身份咧？
A. DH ，Designated Hitter, DH。
B. PH，Pinch Hitter。
C. CH，Changeup。
2.美國職業棒球大聯盟，咱攏知影美國聯盟、和國家聯盟合併起來的。今仔日相戰的這兩隊攏是國家聯盟西區的球隊，予逐家臆看覓，佗一个聯盟先有DH制度？
A.美國聯盟
B.國家聯盟
做伙聽節目，臆答案喔。
12 Apr 2024
《運動小學堂》EP3：台北大巨蛋 《運動小學堂》班長：張詠皓、班導師：阿旻、班主任：黃國洲
上HOT，上好聽的運動節目是咱Radio Taiwan International《運動小學堂》上課囉！班導師阿旻，今仔日𤆬班長張詠皓來對台北大巨蛋測驗一下，因為伊毋但是世界頂級的標準室內棒球場，嘛會當做表演喔。
題目1：
臺灣上大的巨蛋，這陣上濟的人數會當有偌濟？
A:2萬, B:3萬, C:4萬，請你臆看覓？
題目2：
亞洲棒球錦標賽2023年12月初三，臺灣隊對抗南韓隊，到底臺灣是贏或者是無贏？
A:臺灣一定贏, B:歹勢，輸去。
題目3：
臺灣啥人摃出頭一支安打？伊毋但摃出臺灣頭一支安打，規場攏總3支，得著「猛打賞」！
A. 林承飛, B:廖健富, C:拿莫．伊漾。
想欲知影標準答案，緊來收聽《運動小學堂》。
11 Apr 2024
《運動小學堂》EP2：王建民的輝煌戰績 《運動小學堂》班長：張詠皓、班導師：阿旻、班主任：黃國洲，三个人來講運動、講棒球。
運動小學堂班長今仔日欲講出伊上佮意的投手，就是臺灣之光「王建民」。伊講這个球員有影體現「台頂十分鐘，台跤是愛付出十年的功夫」，伊欣賞王建民的伸卡球，佇咧洋基隊內底表現真出脫。另外，王建民輝煌的成績，2006年提著19場贏場，成做美國職棒大聯盟單季，上濟勝投紀錄的亞洲籍投手。2008年4月初2，伊佇咧洋基主場，擔任球季開幕戰的主投手。嘛是MLB有史以來，頭一位佇咧開幕戰主投的臺灣投手，是咱正港的臺灣之光。
班主任黃國洲解釋美國、日本對棒球術語無仝的用法非常精彩，敬請做伙收聽《運動小學堂》。
10 Apr 2024
《運動小學堂》EP1：球場頂 《運動小學堂》班長：張詠皓、班導師：阿旻、班主任：黃國洲
《運動小學堂》邀請明湖國小張詠皓同學，做咱的學堂班長。今仔日伊欲來紹介伊上佮意的捕手。
關於捕手，伊講捕手是球場頂的靈魂人物，甚至是球場頂的總教練。另外閣分享臺灣職業棒球總教練攏總60幾人，自守備位置來看，捕手出身大概8人，雖然無投手15人遮濟。捕手、投手出身的總教練領軍，提著10座總冠軍，但是捕手出身的「總冠軍教練」洪一中是代表性人物，提著7座上濟。
另外，咱邀請黃國洲來做學堂班主任，咱自關鍵的「球」的講法開始，美國是棒球的起源地，英語名號做「Baseball 」；傳去到日本，日本人叫伊「やきゅう」就是「野球」，日本閣掠伊外來語音譯「ベースボール」。日本時代傳來到臺灣，咱愛耍球的老輩，就用倚音，共漢字寫做「麥斯帽屢」（be̍h-su-bō-lú），真正趣味，另外閣有啥物講法，一定愛收聽、學起來。
Research this show Explore Pod Engine's podcast research tools and transcript access.
See plans Is this your podcast? Claim your show to manage its details on Pod Engine.
Claim 運動小學堂 Where this data comes from Each source has its own observation date. These dates do not mean all data was checked at once.
RSS feed Last successful check: 4 Sept 2025 .
Apple Podcasts ratings (US) Snapshot recorded: 29 Sept 2024 .
Spotify ratings Snapshot recorded: 18 Oct 2026 . Host of 運動小學堂? Claim your podcast to manage its listing and keep your show details accurate.
Claim this podcast Pod Engine is an independent podcast discovery and analytics service and is not affiliated with or endorsed by this podcast. Artwork and show content belong to their owners. Full legal notice .
Explore this showPodcast research with Pod Engine
See plans 